بقلم ياسر رافع
يجلس وحيدا على القهوة في الهواء مستمتعا بنسمة هواء منعشه جاءت بعد يوم حار مصاحب لعاصفة ترابية آتت في غير ميعادها في هذا الوقت من العام. وبينما هو مستغرق في المشاهدة فيما حوله، لفت نظرة قطة جميلة من النوع السيامي الجميله تجلس منزويه في ركن جنب الحائط وهو شئ غير معتاد وجود مثل تلك القطط في هذة الأماكن، فحاول مداعبتها وإحضار طعام لها إلا أنها رفضت الأكل وغاصت في نفسها وكأنها تخبره بأنها " بنت ناس وجار عليها الزمن".. هنا يظهر " جوده" صديقه فجأة...
جودة.: السلام عليكم يا كمال
كمال : وعليكم السلام
جودة : إية يا كمال هوا إنت بقيت بتاع قطط ولا إيه؟
كمال : بتاع قطط!! لا دي قطه شكلها بنت ناس متربيه لقيتها فجأة ومش راضية تاكل
جودة : حنين أوي يا كمال.. دا احنا مش لاقين ناكل
كمال : حرام عليك دي روح بردوا. وشكلها اللي كانت عنده رماها في الشارع علشان مش عارف يأكلها
جودة : تصدق عندك حق يا كمال.. جاري عنده قطه كان مدلعها وبيأكلها ويحميها.. وفجأة من كام يوم لقيتها في الشارع بتاكل من الزباله
كمال :الدنيا إتغيرت والحاله الإقتصادية بقت صعبة
فجأة يظهر صبي القهوة ويلفت نظره الحديث الدائر حول القطه بنت الناس فيقول " يا باشا دي مش اول قطه دا اللي زيها كتير وبردوا مش راضيين ياكلوا"
وبعد حديث مالوش لازمة قال " تشربوا إيه؟".. وبعد ما اخد طلباتنا تركنا ومضى...
جودة :إلا قولي.. واد يا كمال.. انا ملاحظ حاجة بقالها فترة على القهوة؟
كمال : حاجة إيه يا شارلوك هولمز
جودة : من غير تريقه بروح أمك!!
كمال : هههههه خلاص كمل كلامك
جودة : إنت مش ملاحظ إن فيه ناس جديدة بقت تقعد على القهوة، وناس تانية إختفت!!
كمال :هههههه آخيرا أخدت بالك.. دا موضوع بقاله سنتين
جودة :إزاي
في هذة اللحظة صبي القهوة أحضر الطلبات وبدأ في وضعها على المائدة ثم مضي، وبينما يضع كمال السكر في الشاي
جودة : مقولتليش يا كمال إيه اللي حصل في السنتين اللي فاتوا
كمال : شوف يا سيدي.. الأزمة الإقتصادية أثرت على رواد القهوة.. ظهرت ناس جديدة وإختفي معظم القديم
جودة : مش فاهم
كمال : الأزمة الإقتصادية ضربت الطبقة الوسطى جامد فظهرت طبقة جديدة إسمها طبقة " المنزلق والمكسوف"
جودة : هههههه شوف بروح أمك.. انت هتشتغلني انت فاكرني عبيط
كمال : اشتغلك ايه يا جحش؟.. دا واقع...
جودة : طيب فهمني بالراحة متزعلش
كمال : الحكاية بسيطة.. الطبقة المتوسطه دي ثلات طبقات.. عليا ومتوسطه وسفلي.. الأزمة الإقتصادية اشتغلت واشتدت.. فاللي في المتوسطة و السفلي وقع تحت خط الفقر.. والعليا بقت تكافح علشان متقعش.. فسموها الطبقه المنزلقه
جودة : هههههه طيب والمكسوف فين!
كمال : هههههه المكسوف دا بقى كان متوسط والفقر بيشد فيه فبيكافح بالمظاهر علشان الناس متشمتش فيه
جودة : هههههه انت عيل كافر.. كل دا انت ملاحظة.. طيب اديني مثال
كمال : ركز كدا بعينك هتلاقي ترابيزات موجود عليها دكاترة ومهندسين وأصحاب اعمال متوسطه ومسافرين..
جودة : هههههه دول مالهم
كمال : دول طبقه منزلقه
جودة : هههههه يا ابن الصرمه هموت من الضحك.
كمال : هههههه دول بقى مكانوش بيظهروا اصلا على القهوة الا نادرا
جودة : طيب الباقيين
كمال : معظمهم من طبقة المكسوفين ودول بيبقوا شبه حسب الله السادس عشر في فيلم شارع الحب.. آلاطه بس
جودة : ودول أعرفهم إزاي
كمال : ركز مع القهوجي
جودة : يعني إيه
كمال :أصبر
( أشار كمال لجودة ان ينصت لحديث دائر بين صبي القهوة واحد الجالسين..
الزبون : انا عاوز سكر للشاي
صبي القهوة : ما انا حطط لك سكر في الشاي
الزبون : بس الشاي دلع وعاوز شوية سكر
صبي القهوة : حاضر من عنيا..)
جودة : مش فاهم حاجة
كمال : هههههه دا حوار شايع ودايما بيكون بين صبي القهوة وزبون من طبقة المكسوفين.. وفي الغالب مش هيجيبلة السكر
جودة :هههههه احا
كمال : علشان كدا بقولك ركز
جودة : انا عاوز أسألك عن واحد كدا..
كمال : قول ما تتكسفش
جودة : هههههه انا خايف من لسانك
كمال : متخافش
جودة : الأستاذ (....).. دا نظامه اية.. منزلق ولا مكسوف
كمال : هههههه انت عارف الطبقه السفلى اللي قلتلك عليها من شويه
جودة : آه مالها
كمال : دي بقي ممكن نسميها طبقة القطه السيامي.. زي نظام اكرموا عزيز قوما زل.. يعني التزم الصمت وانعزل
جودة : هههههه يا نهار اسود
كمال : ما تيجي نقوم بقى وكفاية كدا ؟
جودة : ليه ما تخلينا قاعدين شوية؟
كمال : لا اصل انا هشتري حاجات للبيت
جودة : هههههه يعني معاك فلوس.. الا قولي وانت يا كمال منزلق ولا مكسوف؟
كمال : هههههه شوف يا جودة.. انا واقع في المنطقه اللي بين المكسوف والقطه السيامي.. قوم يا ابن المره علشان نروح
( هههههه ضحك متواصل بينما يقفان إستعدادا للرحيل.. ونادوا على صبي القهوة.. و حاسبوا على المشاريب ثم مضيا في طريقهما)
