بقلم / ياسر رافع
فى جو صيفى خانق يجمع بين الحراة الشديدة والرطوبه العاليه ، إتفق " كمال " و "جودة " على اللقاء تلفونيا بعد مكاملة قصيرة بدا عليها الإمتعاض الشديد من طبيعة الجو الخانقه وأهمية الخروج من البيت لإستنشاق الهواء النقى .على إحدى الكراسى بالمقهى جلس " كمال " ينتظر وصول " جودة " ، مرتديا جلبابا فضفاضا ، ولكنه لم ينتظر طويلا حتى ظهر " جودة " الذى ألقى التحيه ثم جلس ...
كمال : حمد لله على سلامتك يا حاج جودة
جودة : الله يسلمك يا حبيبى ، ربنا يبارك فى أمك ..
كمال : هههههههه ليه بس كدا ، هوا أنا شتمتك
جودة : هههههههههه مش أنا لسه مكلمك من شويه فى الموبايل ، يعني شايفنى كنت مسافر
كمال : لا لا إنت شاكلك زعلان من حاجه ؟!
جودة : لا مفيش ، الجو نار يا يا كمال ، الواحد جايب مايه من كل حته ، الحرارة والرطوبه ملهومش حل
كمال : على رأيك ، دا أنا عايم فى ميه مع إنى لابس الجلابيه ، والمايه ماشيه تحت الجلابيه براحتها
جودة : ههههههههههه إرحم أمى بقى من سيرة العرق والتلزيق دى ..
هنا يظهر صبى المقهى ، ويبدأ فى الإستفسار عن نوعية المشاريب ،
صبى القهوة : تشرب إيه يا عم " كمال " إنت وعم " جودة " ...
كمال : هههههههههه عم كمال
جودة : هههههه إنت ياد بتعاملنا زى ما يكون إحنا بنيع تين على عربيه يد كدا ليه ؟!
صبى القهوة : هههههههه متأخذونيش إنتوا حبايبيى من زمان ...
كمال : إلا قولى هوا إنتوا مش جايبين مراوح ليه ، الجو ولعه
صبقى القهوة : بكرة يا باشا المراوح جاية والدنيا هتبقى زبادى فى الخلاط
هههههههههه ضحكات متبادله ، إنتهت بأن رحل صبى المقهى ليحضر المشروبات .. وبدأ كمال يحرك جلبابه الفضفاض بقوة فى محاولة لتلطيف جسمة بالهواء ، وفجأة بدأ بإزاحته عاليا طلبا لمزيد من التهويه ، فظهر الشورت من تحت الجلباب ....
جودة : إيه با كمال اللى بتعمله دا ..
كمال : إيه بطرى على جسمي من الولعه والرطوبه دى ..
جودة : بس ميصحش الشورت يبان من تحت الجلابيه
كمال : هوا سيادتك معترض على الشورت ولا معترض على إنه تحت الجلابيه
جودة : لا بس المفروض الإنسان المحترم ميظهرش العورة ، وكمان ميلبسش شورت فى الشارع
كمال : ههههههههههه لا لا كدا وسعت أوى ، إنت بقالك كام يوم غطسان ومش عارف لأمك طريق ، ويوم ما تظهر تتكلم فى العورة ، إيه الحكايه ...
جودة : هههههههه بس خدت بالك من موضوع العورة دا ؟!
كمال : آه أخدت ياعم الشيخ ، بس دى مش سكتك خالص ..
جودة : شيخ إيه بس ، دا أنا كنت مشترك فى حملة " غطى فخادك "
كمال : ههههههههههههههههههه غطى إيه يا إبن الجزمه
جودة : هههههههههههه وطى صوتك هتفضحنا ، أبوس راس أمك
كمال : حاضر بس تقولى الحقيقه ، أحسن أفضحك
هنا ظهر صبى القهوة مرة آخرى ، يحمل المشروبات وبدأ فى وضعها على المنضدة ، ثم مضى ، ولكن " جودة " طلب من زجاجة إضافية من الماء المثلج ....
كمال : يلا يا سى جودة ، قولى إيه حكاية فخادك دى إيه ؟!
جودة : أنا هقولك بس أوعى تسيح وتفضحنى ، حاكم أنا عارفك ...
كمال : هههههههههههه عيب يا أبو الجود ، إحكى بقى
جودة : الحكاية وما فيها إن واحد معايا فى الشغل قالى تيجى معانا ، إحنا بنعمل حملة لتوعية الشباب بأهمية الإلتزام بالإخلاق ، وأول حاجة هنعملها نقولهم بلاش يمشوا بالشورت فى الشارع علشان فتنة البنات ...
كمال : ههههههه كمل يا عم الشيخ
جودة : إتلم يا كمال ، المهم قولتلوا واحنا هنمشى في الشارع نعمل كدا ولا إيه النظام ، فقالى لا إحنا هنبدأ الحمله على الفيس بوك الأول وبعدين نشوف الناس هتتفاعل معاها إزاى ، وهنختار لها إسم " غطى فخادك " كإسم روش يناسب الشباب والناس متقولش علينا متشددين
كمال : هههههههههههه دا العمليه وسعت أوى ، كمل يا منيل على عينك
جودة : المهم أنا قلت أجود معاه ، فقلت ليه ميبقاش إسمها " غطى فخدك " علشان تبقى موجهه للشباب فقط ، وعلشان محدش يتهمنا بالتطرف لو قلنا " فخادك " فيقولوا دول يقصدوا البنات والستات ..
كمال : ههههههههههه الله وأكبر يا شيخ جودة ،
جودة : أصبر يا زفت ، وبعدين الحملة بدأت والدنيا زاطت ، بس فى يوم وأنا راكب المترو لقيت مجموعه من الشباب لابسين شورتات ، فقلت ياد يا كمال ما أجرب اقولهم موضوع الفخاد دا ..
كمال : ههههههههههههههههه أوعى يكون حصل معاك اللى فى جاى فى بالى ...
جودة : ههههههههههههههه بالظبط زى ما إنت متخيل ، العيال روقونى ، اللى يقولى " وهوا إنت لابس شورت ولا ملط " والتانى " وإنت فخادك حلوة زي وشك ولا العكس " ، والتالت " ما تنزل البنطلون وورينا العورة " .......
كمال : يخربيت أمك ، دا إنت إتعمل عليك حفله ..
جودة : دا طبعا غير التريقه والضحك من الركاب ، لحد ما واحد من الركاب شكله محترم قالى تعالى يا استاذ أقعد جنبى ، وبدأ يسكت فى الناس بصوت عالى ويذكرهم بمكارم الأخلاق ، وما أن سكت الجميع إحتراما لكلمه ، حتى جلس ووجه كلامه ناحيتى " وإنت بروح أمك ملقتش غير الفخاد وعاوز تغطيها وهتجيب لنا الكلام والناس تتريق وتكره النصيحه ، يا إبنى الناس محتاجه اللى يحسها على الفضيله مش اللى يتعمد يحاسبها ويحسسها إنها غلطانه " ..
كمال : الراجل دا جامد آخر حاجه ..
جودة : الله يباركله أنقذنى من موقف مالوش حل
فى هذة اللحظه ظهر رجل يلبس شورتا وتيشيرت ، فغمز " كمال " لـ " جودة " بعينيه ، فضحك " جودة " وقال حرام وتوبه ، إنشاله يمشى ملط
كمال : طيب يلا نقوم نروح الوقت إتأخر
جودة : يلا أنا كمان مش مرتاح فى القعدة النهاردة ، الجو مش لطيف
نادى " كمال " على صبى القهوة الذى جاء مسرعا وكان يرتدى شورتا ، وبينما يدفع له الحساب
كمال : إنت ياد ماشى بالشورت كدا ليه
صبى القهوة : وهوا الشورت حرام
كمال : مش حكاية حرام ، بس المفروض تغطى فخادك
جودة : ههههههههههههههههه آه يا كمال يا ابن الجزمه ، إنت ناوى تفضحنا
صبى القهوة : يا باشا وهوا أنا ماشى وسط حريم ، واللى مش عاجبة يدارى وشه
كمال : طيب لو عمك " جودة " جابلك شوية صور تعلقها على الحيطان القهوة ، مكتوب عليها حملة " غطى فخدك " ترضى تعلقها ..
صبى القهوة : لا طبعا مش هرضى الناس هتقول كلام وحش على القهوة ، (...) هيا وصلت للفخاد
ههههههههه هنا تعالت ضحكات " كمال " و " جودة " وتأبطا بعضهما البعض ، وكمال يمشى رافعا طرف جلبابه عاليا مظهرا الشورت ، ويقول لــ " جودة " لو نطقت كلمه تانى على الشورت هفضح أمك .
.jpg)
ليست هناك تعليقات:
إرسال تعليق
مرحب بكل الآراء ما عدا الآراء التي تحمل محتوى عنصري او يدعو إلى العنف او التفرقه السياسيه والاجتماعيه