بقلم الأسطى / ياسر رافع
ياه على غربتى بعدك يا خال ، يا ولداه على غربة الأحباب ، بتخللى الواحد منا وحدانى عامل زى عود الدره الناشف فى غيط كمون . أول ما جانى خبر موتك يا خال حسيت بالخوف ناشع فى عروقى زى البرد ، وإتذكرت ساعتها تشجيعك ليا ووقفتك جنبى ، انت اللى خلتنى صنايعى وقولتلى إن صاحب الفاس ممكن يصير صاحب صنعه ..مشتاقلك يا خال شوق الأرض لبل الريق . شوق الزعلان للنسمه لما الصدر يضيق ، يا خال لو الورقات تكفى لكنت أعبيلك بحر النيل كلام
ياه على الإيام لما تحنى الضهر وينهش المرض فى الجته وانا لا قادر أشيلك على كتفى وماشى وراك أتسند ، واسمع صوت الصويت والعويل وتعديد النسوان ، و حاسس إنى طيره مهاجره جناحها محتار واقف على باب القبر ، كانس كل دروب الجبلايه بديل توبى ، طاوى كفوفى وبخبط بيهم على صدرى والنعش ، سامع صوتك بتقول مين ؟؟ مسيت الدمعه فى حزنى عليك . ماعرف ساعتها ايه اللى جرالى .. وأفوق ألاقى عزيزه وعيد بيشدوا فى توبى والدمعه ماليه الجفون .. الجد مات يا ابوىفينك يا أم علب عباس ، أبوس إقدامك ونقولك سامحينى لما زهقت عليكى فى جواباتى ، لما قالولى قاعده على العتيبه إيد على خد وماسكه عود قش بتبكى وتخطط فى تراب الدرب ، ما كنت أعرف إن الفراق صعب كدا .. بيخللى القلب أسخن من رمل القياله لما يقيد ، ويبقى عش خراب بيصرخ على طيره ، والعين يكسيها الدخان من كتر دموعها . أمانه ياخال لما تقابل أم علب عباس قولها تسامحنى ، لانى انا وولدها إنحنى بينا الضهر وبقينا يتما
خلاص يا خال إنكسر القلم واتبعترت الورقات و معدش مروزق البسطاوى يخبط على دارى ويقولى خالك بعتلك جوابات .. البيت بقى واسع كدا وحيطانه مطاوله بعدك ، والعمر بينهش فيا بعد الواد والبت ما سابونى لوحدى فى نهاية العمر ، وما عادت السمريه معاك تونسنى ولا عاد تلعب بالقمارى مع الولد .
مع السلامه يا خال الجبلايه كلها بتقولك مش راح ننساك ، وسلوتى فيك لما ألمح عصايتى وتوبى وفاسى ومداسى وأتذكر قولك مضيعناش الفاس ، ولكن ضيعتنا غربة الزمن اللى عايشينه
ليست هناك تعليقات:
إرسال تعليق
مرحب بكل الآراء ما عدا الآراء التي تحمل محتوى عنصري او يدعو إلى العنف او التفرقه السياسيه والاجتماعيه