بقلم / ياسر رافع
بعد اتصالات كثيرة من خلال الموبايل باءت جميعها بالفشل حاول من خلالها " جودة " الإطمئنان علي "كمال" الذي لم يراه منذ أيام . وبينما يمشي في اتجاه المقهي ، وجد محل طيور وحيوانات أليفه قد فتح أبوابه ، ولاحظ أن أحد أقفاص الحيوانات تحتوي علي قرد "نسناس" وحوله مجموعه من الأطفال يقذفون إليه لب وسوداني فرحين بمنظر القرد ، هنا وقف "جودة" يتفرج للحظات ثم مضي .
عندما وصل المقهي أخذ يلتفت يمينا ويسارا محاولا البحث عن
"كمال" ولكن عبثا ، هنا أشار لصبي المقهي وسأله عن " الأستاذ
كمال" ، فأخبره الصبي عن أن الأستاذ كمال " قاعد لوحده من بدرى في آخر
القهوة " . فذهب جوده حيث أشار صبي المقهي ، وحين وصل
جودة : السلام عليكم ورحمة الله
كمال : وعليكم السلام ، انت وصلت
جودة : مالك قاعد لوحدك كدا ليه
كمال: مضايق شويه ، ومش عاوز أقعد مع حد ، وحتي قايل
للقهوجي ميقولش اني انا هنا
جودة : هههههههههه خير يا عم الكئيب
كمال: مش ناقصه هزار أمك النهاردة ، سيبني في حالي
جودة : الموضوع شكله كبير ، خير يا كمال طمني فيه حاجه
حصلت لك
كمال : لا مفيش حاجه بس نفسي أقعد لوحدى زي زمان ،
جودة : سيبك من الجو دا ، أنا عارفك هتقلبها غم وأنا مش
ناقص ، شوفت النسناس اللي علي باب المحل اللي جنب القهوة
كمال : شوفته ميتخيرش عنك يا جودة
جودة : هههههههههه مش انت ابن صرمه، وعاملي فيها عم
المكتئب
هنا وصل صبي المقهي حاملا صينيه عليها كوبين من الشاي
ووضعها علي المنضده ، وبينما يلتفت للذهاب
جودة : إلا قولي يا برنس هوا انت جايب الشاي من غير سكر
ولا معلقه ليه
صبي القهوة : ايه يا باشا انا حافظ سكرك وظابطهولك فهتحتاج
السكريه ليه
جودة : هوا انتوا ليغتوا الأوبشن بتاع السكريه والمعلقه
خلاص
هههههههههه ضحكات بصوت عالي من كمال وجودة ، ومضى صبي
المقهي مستغربا من الضحكات
كمال : مش انا قلتلك انك متتخيرش عن النسناس
جودة : اتلم يا كمال ، هوا انت شايف بيترمي ليا لب وسوداني
كمال : هههههههههه وايه الفرق بين رمي اللب والسوداني
والقهوجي لما يجيب لك كوباية الشاي من غير سكر ولا معلقه ولا ازازة ميه
جودة : هههههههههه كمال انت كدا هتسخني عليه وأنا عفاريت
الدنيا بتتنطط في وشي
كمال : اهدي خلاص ، انا مش ناقص دوشه، بس قولي صحيح مش انت
كنت عاوز تشتري قرد زمان
جودة : انت لسه فاكر ، دا كان لما زرنا جنينة الحيوانات
واحنا فى الإعدادية
كمال : هههههههههه طيب فاكر لما انت قلت للأستاذ هما
حابسين القرود ( النسانيس) في أقفاص ليه ، فقالك علشان يحافظوا علي سلالتك
جودة : هههههههههه الله يرحمه بقي ، بس انا كنت مبسوط لما
كنت برمي السوداني للقرد وبحس انه فرحان مع انه محبوس ومش حر
كمال : مين قالك انه مش حر ......
جودة : مش فاهم
كمال : انت شايفه مش حر ، لكن لو خرج من القفص فجأه وأختلط
بالناس الغرباء عنه هيصاب بالذعر والناس اللي كانت فرحانه وهوا داخل القفص هتبتدي
تخاف منه وهتبتدي تهاجمه وتضربه وكمان يتحدوا علشان يمسكوه ويرجعوه القفص تاني ،
دا اذا مامتش....
جودة : انت هتجنن أمي ، ما دا طبيعي بالنسبه للقرد، يعني
عاوزه يعض الناس
كمال : هههههههههه عرفت انك مش عاوزه حر ، انت عاوز نسناس
تلعب بيه
جودة : انت فكرتني بمقوله ل_" ناجي العلي " كان
بيقول فيها " يا وطني ، كل العصافير لها منازل ، إلا العصافير التي تحترف
الحرية ، فهي تموت خارج الأوطان "
كمال : يا ابن اللعيبه يا جوده جبتها منين دي ،
جودة : هوا إنت فاكرني قاعد بعربيه تين وماسك صفيحة ميه في
ايدى ، انا بقرا بردوا زيك
كمال : هههههههههه ماشي يا عم الكوز ، عرفت بقي إن الحريه
يعني وطن ساكنيه بتعريفهم هم
جودة : يعني دا ينطبق علي اللي ساكنين فى الكومباوندات
كمال : هههههههههه قصدك جمهوريات ما وراء الأسوار ، أكيد
ينطبق عليهم ، فهم لهم فهم للحريه مختلف عن شعب خارج الأسوار
جودة : حاسب يا عم ايه شعب خارج الأسوار دي
كمال : انت زعلت كدا ليه ، هوا انت تقدر تعدي السور
جودة : هههههههههه تصدق انك ابن "
...... "
كمال : انت اخرك تنادي وتقول " الحرية للنسناس "
، لكن لو خرج هيطلع روح أمك
هههههههههه ضحكات متبادلة، ثم وقفا سويا وطلبا من صبي
المقهي حساب المشاريب ، وبينما يهمان بالرحيل
جودة : نفسي يا كمال أسكن في كمباوند وحراسه وسور وكلاب
وعربيه يااااااااااه
كمال : هههههههههه ما دا نفس تفكير النسناس جوه القفص
جودة : بس انا مش جوه الكومباوند
كمال : هههههههههه ازاي دا انت في القفص الكبير
تمت
ليست هناك تعليقات:
إرسال تعليق
مرحب بكل الآراء ما عدا الآراء التي تحمل محتوى عنصري او يدعو إلى العنف او التفرقه السياسيه والاجتماعيه