كمال وجوده (6)

 

بقلم / ياسر رافع

سارا سويا بإتجاه مقلة اللب والسودانى والمقرمشات ، ينظران للمارة من حولهم ويعلقون بكلمات ساخرة على ما يرونه من تغيرات واضحه على واجهات المحلات بمناسبة رأس السنة ، وما أن وصلا إلى المقله ، حتى أدخل كلا منهما يديه فى جيبه ليخرج النقود التى سيشترون بها ، وما أن أخبرا صاحب المقله بطلباتهم من اللب والسودانى ، حتى فاجأهم صاحب المقلة والذى يرتدى جلبابا صعيديا ..
صاحب المقله : هابى نيو يارد يا أستاذ كمال
جوده ههههههههههه : هيا بقت يارد دلوقتى
كمال : كل سنه وإنت طيب يا معلم
جودة : كمال هوا المعلم بقى أفرنجى من إمتى ؟!
كمال : ومش عاوزه يبقى أفرنجى ليه ؟! هوا وشركات المحمول بس اللى كانوا شغالين فى الكورونا
جوده : هههههههههههههه خلص يا معلم بسرعه كمال شكله سخن

صاحب المقله قام بوضع طلباتهم وأستلم منهم النقود ، وقاما كمال وجوده بتحيته ، وسارا سويا بإتجاة المقهى يمنيان نفسيهما بسهرة جميلة مع صوت " قزقزة " اللب والسودانى  ، بضع دقائق كانا يجلسان على الكراسى فى المقهى وصبى القهوة واقفا بجانبهم يستمع إلى طلباتهم ، وبعد أن أصبحا سويا قاما بفتح أكياس اللب والسودانى وبدءا فى " القزقزة " ..

جودة : إلا قولى ياد يا كمال إنت هتقضى ليلة رأس السنه فين ؟!
كمال متنهدا تنهيدة ، وزفر زفرة كبيرة : يااااااااااااااااااااااه هوا انا معايا أحلق
جوده هههههههههههههه : كمال أبوس راس أمك مش ناقصاك ، هنبتديها سواد ، إنت عيل كئيب ومش وش إحتفالات ....
كمال مبتسما : طيب وسعادتك هتقضيها فين ، يا نجيب يا ساويرس !!
جودة وهو يبصق قشر اللب : هههههههههههه عادى زى كل سنه ، هسيح البربور !!
كمال ههههههههههه : بربور إيه يا أبو الجود ، إيحاءاتك كدا مش حلوة .
جوده هههههههههه : دايما نيتك وسخه ، الحكايه إن مراتى كل راس سنه متعودة تعملى حلة محشى سخنه وشوربة لحمه ، حاجه كدا من اللى تسيح البربور وتخليك تاكل بذمه
كمال : ودى بتاكلها وتنام علطول .......
جوده : يعنى ساعه كدا وأنام
كمال : نامت عليك حيطه ، دى أكله تسيح البربور وتخرجك من الدنيا ، فيه حد ياكل الأكل دا وينام
جوده : يا عم كبر دماغك ، هيا موته ولا أكتر ! بس سيبك إنت ، قولى إنت بقى هتقضيها فين !!
كمال : هيا مين ؟!
جوده : أمك يا كمال !! ههههههههههههه راس السنه
كمال هههههههههه : آه نسيتنى بحكاية بربور أمك ، فيه بنى آدم يبتدى السنه الجديدة وهوا نفسه بربورة يسيح ..
جوده : ملكش دعوه ...
كمال : عادى مفيش حاجه محدده ، ممكن أتفرج على التلفزيون ! أسهر مع واحد زيك كدا ! أقعد أقرا لحد الصبح .........
جودة : حبيبى يا كمال طول عمرك مثقف وخنيق وإبن .........
كمال هههههههههه : بس تعرف أنا نفسى فى إيه ؟!
جوده : قول ما هيا هتبقى ليلة راس سنه كئيبه
كمال : نفسى القهوة دى تتحول لقهوة فى عصر المماليك ، الناس قاعدة مسطوله من الحكايات على الربابة ودخان الجوزه مالى المكان ، والناس كلها واحدة وحافيه .......
جوده : مين كان صاحب القهوه دى يا كمال
كمال : الملك بيبرس
جوده : صاحب القهوة إسمه المعلم بيبرس
كمال هههههههه : صاحب القهوة !! دا السلطان بيبرس إللى إخترع حكاية القهاوى فى مصر
جوده ههههههههه : بسم الله ما شاء الله ، وكمان طلعت القهاوى إختراع الحكومه
كمال : قهاوى كدا تحس وإنت بتقرا عنها إنها عالم سحرى ..........
جودة هههههههه : وفقر ومرض ودبان وناموس وبلا أزرق على دماغك أهلك ، مش أنا غلطان إنى بقعد معاك !! هيا راس السنه مستحمله ثقافه أمك
كمال : يخربيت أمك ! سيبنى أحلم ، مش كفايه معنديش أى حاجه ، مفيش
جوده ههههههههه : إتفرج على الأفيش

ههههههههههههه ضحكات متبادله ، لفتت نظر كل الجالسين على المقهى

جوده : متزعلش يا كمال ! إتخيل إنك فى قهوة المعلم بيبرس إللى إنت بتقول عليه دا ، كنت هتعمل إيه
كمال : ياااااااااااااه متخيل نفسى ماسك جوزه بغابه طويله وبطلع دخان من مناخيرى وصوت المنشد والربابه وآهات الناس بيلفوا فى المكان ، وفجأة المعلم يحط على راس الجوزه حته حشيش والجو يزرق ....

لمسات من يد جوده على كتف كمال الغارق فى توصيفاته

جوده : ممكن سؤال يا كمال باشا !! هو سعادتك بتشرب حشيش من أمتى ؟!
كمال : ولا عمرى شربته
جوده : امال عمال توصف فيه وكأنك ضريب قديم
كمال : من الكتب يا جوده
جوده هههههههههههههه : كذب المثقفون ولو صدفوا

هههههههههههههههه ضحكات عاليه ، إنتهت بدفع ثمن المشروبات ، ومشيا سويا بعض خطوات خارجين من المقهى ، وأفترقا كلا فى إتجاه ، واحد " هيسيح البربور " والتانى " هيتخيل الحشيش "