نظرية البانيه التآمريه

بقلم / ياسر رافع

أمام شاشة التلفاز على المقهى جلسنا جميعا نترقب مباراة كرة القدم متحلقين حول الطاوله بين من يرتشف كوبا من الشاى وبين من يحتسى القهوه ومن يمسك بيديه خرطوم الشيشه ويسحب دخانها ثم ينفثه فى الجو مخلفا سحابه من الدخان الممزوج برائحه المعسل ، وفى الوقت الذى كنا نجلس حول الطاوله نتكلم فى حوارات جانبيه ، فجأه وجدنا إثنين من الأصدقاء وقد علا صوتهما بعض الشئ وبدا أن إحتدام النقاش بينهما ذاهب فى إتجاه مشاجره فحاولنا تهدئتهم وهو ما حدث حتى بدا أننا قد وصلنا إلى صيغه مناسبه لحل هذا الموقف وهى أننا أخوه ولا يجب أن يتحول الحديث بيننا إلى شجار فى مكان عام وهنا وجه أحدهم حديثه فى إتجاهى :
صديقى 1 : شوف يا أبو عمار أنا عاوزك تحكم بينا فى الموضوع دا !
أنا : موافق
صديقى 2 : وأنا كمان موافق !
أنا : طيب أسمع إيه اللى حصل الأول !!
صديقى 1 : شوف ! أنا كنت بتكلم معاه – وأشار إلى صديقه – وبنتكلم عن حال البلد وأنا كنت بقوله إن حال البلد هيتصلح بس الدول اللى بتتآمر علينا تسيبنا فى حالنا وساعتها هتشوف بلدنا أحسن بلد فى الدنيا وكفايه إللى حصل فى السنين الى فاتت ، فرد عليا وهاجمنى وقاللى إنت مش فاهم حاجه دى مؤامره من الداخل لإشغالنا عن مطالبنا وحقوقنا وبدأ يتهمنى بعدم الفهم ...
هنا قاطعه صديقى 2 ، وأشار إليه بيديه قائلا :
صديقى 2 : ولكن أنا لم أستهزأ بك ولم أقلل من شأنك حتى تتهمنى بالعماله !
صديقى 1 : وأنت قلت إننى مغيب وجاهل !

هنا تدخلت حتى لا ينفلت الحوار وينزلق مرة أخرى ناحية الشجار
أنا : ممكن أسألكم سؤال لكما إنتوا الإثنين ؟!
فى صوتا واحد " طبعا ممكن "

أنا : هوا إنتوا واكلين " بانيه فراخ " قبل ما تيجوا على القهوه ؟!
صديقى 1 : إنت شكلك هتهزر ومش هتحل حاجه !
صديقى التانى  2 : وإيه اللى جاب البانيه لكلامنا ؟
أنا : طيب ممكن تسمعونى ! الحوار فى مصر بين الناس بعضها البعض حصل فيه إستسهال مريب والكل إرتكن إلى نظرية المؤامره ، ودى نظريه لذيذه خفيفه الهضم كرا وفرا ، تقدر تخلص بها أى موضوع تحس فيه إنك على وشك الهزيمه ، زى ما المدام ما بقت تستهل تعملك بانيه فراخ ومكرونه كوجبه أساسيه ، ولما تعترض تفاجئ بسيل من التبريرات لدرجه إنك ممكن تسمع إن الهجوم الإسرائيلى على غزة وحصار العراق كانا السبب فى عملها تلك الوجبه ...
هنا علا ضحك الحضور ، وبدأ كل واحد يمازح الآخر بأنه أصبح لا يطيق تلك الأكله التى أصبحت عنوانا عريضا للأسره المصريه وضاع زمن المحشى والبط والملوخيه لصالح هذا الوافد الأجنبى على مطبخنا
صديقى 2 : كمل يا أبو عمار سيبك منهم !
أنا : وجبة البانيه دى بقت عامله طبقا لنظريه " دارون " للتطور إللى بتقول إن العضو الخامل يضمر ، فجعلت بمرور الوقت الست المصريه تستسهل الوجبات الجاهزه وتركت الوجبات المتكامله حتى أصبحت ثقافة التيك أوى الغربيه منتشره للدرجه أن تستطح العقل المصرى وأصبح لا يفكر بعمق وهذا ما جعل من نظرية المؤامره وسيله دفاع وهجوم فى نفس الوقت بين المتحاربين والنتيجه لا شئ غير الإنقسام والتناحر فالجميع تمترس خلف الإستسهال دون إبراز دليل واضح المعالم على كلامه .
صديقى 1 : بس الكلام بتاعك دا بينكر المؤامره ولكن أنا بقول إن فيه مؤامره  وواضحه كمان !!
أنا : المؤامره بشكلها العام مستحيل إثباتها بالكامل ولكن هناك فعل تآمرى ودا بيبقى له شواهد كثيره لكن لا تستطيع وضعه فى إطار محدد فى معظم حالات رصده
صديقى 2 : طيب ممكن تثبت كلامك دا ؟!
أنا : بسيطه ! هوا حد فيكم حافظ سورة " آل عمران " ؟!

الجميع وكأن على رؤوسهم الطير وبدا البعض يتمتم بما يوحى أنهم لا يحفظون شيئا منها
 
أنا : عارف إنكم مش حافظين أى حاجه وتقريبا أنا زيكم ، لكن فى الآيه رقم (173) يقول الله تعالى " الذين قال لهم الناس إن الناس قد جمعوا لكم فأخشوهم فزادهم إيمانا وقالوا حسبنا الله ونعم الوكيل " والآيه دى تعتبر فى نظرى تفسير يبين الفرق بين المؤامره والفعل التآمرى ، فأبوسفيان أراد أن يشن حرب نفسيه على الرسول (ص) فى المدينه فقابل تجار من المدينه بعد غزة أحد وقال لهم يخبروا الرسول وأتباعه بأنه قادم إليهم وأنه يجمع له القبائل لمحاربته ، فذهب التجار وأخبروا الرسول الذى أخبر أصحابه فما كان منهم إلا أن إزداد إيمانهم وقالوا حسبنا الله ونعم الوكيل وتمسكوا بمبادئهم وبصبحة رسولهم ولم يرتكنوا لنظرية المؤامره وإشاعه اليأس بينهم وثبتهم ربهم من فوق سبع سماوات وأنزل آيه تمدحهم وتثبتهم ، ولكنهم لم ينكروا فعل التآمر وتجهزوا له وأنتصروا فى غزوة الأحزاب بعد ذلك
صديقى 1 : يعنى مصر مش بتتعرض لمؤامره !
صديقى 2 متهكما : شوف الجاهل بنقول إيه وهو عاوز يوجهنا لحديث آخر !
أنا : شوف ، طول ما تجار المدينه إللى نقلوا تهديد أبو سفيان للرسول  (ص) عايشين بيننا فسوف تسمع نظرية المؤامره كثيرا لأنهم أشاعوا نظرية الإستسهال فى نقل الأخبار لغرض فى نفوسهم ، وفى المقابل يجب علينا إذا كنا نعلم أن هناك فعل تآمرى واضح فيجب أن نتماسك ولا نستسهل رمى التهم جزافا فى وجه بعضنا البعض ، وفى المقابل يجب ان يتم التحذير من هذا الفعل بطريقه لبقه ومحترمه
صديقى 1 : يعنى نظرية المؤامره موجوده ، يبقى أنا إللى أستاهل إعتذار منه
صديقى 2 : دا فعل التآمر بتاع أمثالك !
أنا : تصدقوا بالله إنتم الإتنين زوجاتكم عامله فى البيت بانيه ومكرونه
هنا كان صبى المقهى يضع المشروبات على الطاوله ، ويبدوا أنه قد لفت إنتباهه سماع كلمة البانيه
صبى القهوة : الله يلعن البانيه على اللى أشار ليه من ساعة ما إتجوزت وأنا باكل بانيه ومكرونه لحد ما الواحد  بقى بيمشى فى الشارع هفتان وعلطول جعان
هنا إنقلب الوضع لضحك هستيرى وبدا الجميع ينظرإلى صديقى 1 ، وصديقى 2 ويضحك ويقولوا " بانيه " ، " بانيه "
وبدأت المباراه وألتفت الجميع للشاشه ، صياح وهيجان " محمد صلاح " جاب جون