مولد سيدى العريان الدستورى

بقلم / ياسر رافع

جاء منفعلا ، وركل الكرسى بقدمه ، ثم جلس عليه بجوارى نافثا دخان سيجارتة فى الهواء معبرا عن ضيق واضح ، وما هى إلا ثوانى بعد هذا المشهد حتى وجدتنى فى حوار مع صديقى الغاضب :
أنا : مالك ؟ فيه إيه ؟ حد ضايقك .
صديقى : لا مفيش حاجه ؟ شويه وهبقى كويس
أنا : طيب لما تهدى إبقى إتكلم براحتك
هنا ظهر صبى القهوه ، ويسألنا السؤال التقليدى " تشربوا إيه ؟ " .. فطلبت منه واحد شاى ونظرت لصديقى فوجدته يشير لصبى القهوه بإصبعه ويقوله " خليهم إتنين شاى " فى حاله مزاجيه بدأت تتعدل وتزيح من بين قسماتها الغضب الذى بدأت به . وهنا تشجعت مرة أخرى لأكلمه :
إنا : إنت مالك غضبان ليه ؟ وداخل بزعابيب أمك عليا
صديقى : إسمع يا سيدى ، وأنا جاى على القهوه واحد إنت تعرفه كويس وقفنى فى الطريق وقعد يكلمنى فى السياسه والمفروض يحصل كدا وميحصلش كدا ، لحد ما وصل بالكلام للتعديلات الدستوريه إللى عاوزين يعملوها لتمديد فترة رئاسة الجمهوريه من أربع سنوات لست سنوات ، ....
أنا : طيب فين المشكله بقى ؟
صديقى : ما أنا جايلك فى الكلام . المهم قعدت أكلمه وأشرح له وجهة نظرى فى الموضوع دا ، وفجأه لقيته بيقولى إنت وأمثالك السبب فى اللى بيحصل فى البلد ؟ هنا صوتى بدأ يعلى وأحتد النقاش شتمته والناس فرقت بينا ..
أنا : يعنى فرجتوا الناس عليكم ؟ يا نهار أسود
صديقى : أنا لازم أعرفه مقامه
هنا قلت فى نفسى لازم الجو يهدى أحسن صوته يعلى ، وفى هذا الأثناء ظهر صبى القهوه يحمل صينية الشاى ووضعها على الترابيزه ، وقلت له :
أنا : سيبك إنت من الكلام الفاضى دا ؟ انا عاوزك تجاوبنى على سؤال
صديقى : إسأل عاوز إيه ؟
أنا : هوا الواد اللى إتخانقت معاه كان رأيه إيه فى إستفتاء مارس 2011 والدستور 2012 والدستور2013
صديقى : راح إنتخب وقال " نعم " فى التلاته
أنا : وإنت سيادتك كان رأيك إيه ؟
صديقى : قلت " نعم "
أنا : طيب إنتخبتوا مين فى الرئاسه ؟
صديقى : فى الأول إنتخبت حمدين ، وبعدين مرسى ، وبعد 30 يونيو إنتخبت الرئيس السيسى
أنا : طيب أنا مش شايف خلاف بينكم ، ليه بقى التعديلات الدستوريه واقفه فى زوركم ما إنتم مش عارفين الإختلاف بين المرشحين وبتقولوا " نعم " علطول
صديقى : يعنى الواحد ميقولش رأيه ؟
أنا : يا عم إنتوا خليتوها خل على الأخر ، إسمع إنت تعرف قصة مولد " سيدك العريان "

صديقى : إنت شكلك هتبدتى تهرج وتقلبها ضحك وهزار ، هوا فيه مولد بالإسم دا أصلا ؟ دى تريقه ماشيه بين الناس ظهرت فى فيلم لعادل إمام كان إسمه " امير الظلام "
أنا : طيب إسمع  يا سيدى ، زمان أيام الملكه شجرة الدر كان " كاتم أسرارها " راجل مسيحى ، الراجل دا إتجوز وخلف ولد إسمه " برسوم " لكن الراجل دا مات هو وزوجته وتركوا الولد صغيرا ، فقام  خاله بسرقة ميراثه ورماه فى الشارع ولم يكن يلبس إى شئ إلا عبايه على جسمه العريان ، وعلشان كدا سموه " برسوم العريان " ، مرت الأيام متنقلا ومرتحلا حتى وصل وأستقر به المقام فى مغاره فى كنيسه فى الصعيد ، بعد ما كانوا حذروه من المغاره لأن فيها ثعبان كبير ، ولكنه دخل المغاره قائلا للثعبان " قف مكانك أيها المبارك " فتحول الثعبان إلى حيوان أليف وأكمل قائلا " من الأن يا مبارك لا تكون لك قوه ولا سلطان أن تؤذى أحدا تكون مستانسا ومطيعا لما أقوله لك " .. وعاش مع الثعبان فى المغاره خمسه وعشرين سنه ،
صديقى : طيب وبعدين ؟

أنا : إهدى على رزقك . المهم عمك برسوم العريان تحول بزهده وبورعه إلى رقم صعب فى السياسه نتيجة إلتفاف الناس حواليه ورفضه لسياسات الوالى المملوكى ، فكان الوالى علطول يجلده لعدم إطاعته الأوامر ، لحد ما مات ، ومرت الأيام وبقى من الأولياء وبقى له مولد كل سنه فى المعصره  بحلوان ....
صديقى : أنا مش فاهم حاجه ؟ وإيه علاقته بالتعديلات الدستوريه
أنا : المهم عمك برسوم العريان بمرور الزمن وطبقا للشخصيه المصريه تحول إلى ولى من الأولياء  ومولد سنوى ، وأختلط الحابل بالنابل وبقى إسمه عند عوام المسلمين " سيدى محمد البرسومى " والمسيحيين " سيدى البرسومى " ، وتحول زهد الراجل وكفاحه ضد ظلم الوالى والسلطه ، إلى مولد وطبل ورقص وحمص وحلاوه ..
صديقى : أنا حاسس إنك بتتريق عليا ؟
أنا : حاسس ، دا إنت جبله ومبتحسش ، دا إحنا عدينا مرحلة عمك برسوم العريان الراهب اللى تقشف وزهد وكافح السلطه وسيطر على ثعبانه " المبارك " ، ووصلنا لمرحلة هو المولد إسمه " سيدى العريان " ولا " سيدى محمد العريان " ، ولا " سيدى البرسومى " . لمرحلة هى تعديل دستورى ولا تعديل ماده الرئاسه ؟ فيه إنتخابات رئاسه ولا لأ ؟
إبتسم وتحول إلى ضحك ثم إعتدل فى جلسته
صديقى : على فكره انا فاهمك من ساعة ما قلت حكاية الثعبان " المبارك " ، طيب نعمل إيه ؟
أنا : تعمل إيه وجايلى انا أقولك تعمل إيه ؟ ماشى .. شوف إنت تروح مولد سيدك العريان هو قرب على فكره فى نص شهر سبتمبر اللى جاى ، وتسأله تروح تنتخب ولا لأ ؟ تقول نعم أو تقول لأ ؟ .. بس متنساش حاجه مهمه
صديقى : إيه ؟
أنا : وأنت بتلف حول المقام تقول الكلمه السحريه " عم يا عريان يا طب التعبان " 
إنتهى الحوار