بقلم / ياسر رافع
خناقة على الطريقه المصريه جموع غفيرة من الناس متشابكه تتدافع يمينا وشمالا وأصوات متداخله وشتائم كثيرة ومتنوعه تطال كل شئ الأنساب والأعراض وحتى الإنتساب للدين . هنا يظهر كمال وجوده على أطراف الخناقه يحاولان معرفة سببها ومن أطرافها لكن هيهات فما هى إلا دقائق وأنفضت الخناقه وأنصرف الناس وبقى كمال وجوده مندهشين لسهوله إنفضاض الخناقه :كمال : اللى قولى يا جوده ، هيا العالم دى كانت بتتخانق بسبب إيه ؟!
جوده : دى عالم " .. " هيصه وشوشرة على الفاضى ، وعطلوا الطريق وخلاص
كمال : إنت تعرف إن اللى حصل دا مكتوب فى مذكرات الحملة الفرنسيه
جوده : ههههههههه هوا بونابرت كان بيسلك خناقات
كمال : إفهم ، انا قصدى إنهم رصدوا ظاهرة خناقات المصريين فى الشارع
جوده : يا راجل بتتكلم بجد !!
كمال : الفرنسيون كتبوا بأن المصريون يميلون إلى " الشوشرة " لا إلى المشاجرة لأنهم يتفادون الخطر بقدر المستطاع ، وهم قادرون على التكيف مهما كانت الظروف قاسية .
جوده : هههههههه وربنا شعب مالوش حل
وسط الضحكات المتبادله ومواصلة السير سويا بإتجاة القهوة ، وتحيات وسلامات متبادله مع المارة ، بضع دقائق وقد وصلوا إلى القهوة وجلسوا فى المكان المفضل لديهم على كرسيين متقابلين ،
جوده : الا قولى يا كمال ! هيا الناس بتعمل كدا ليه فى بعضها
كمال : الناس غلابه يا جوده ! دا إسمه مقاومه بالحيله ؟!
جوده : أوباااااااااااااااااااه دخلنا فى السياسه
كمال : إسمع يا حمار ! هوا إنت عندك " هسهس " من السياسه
جوده : لا ما انا عارفك يا كمال !!
كمال : بس سيبنى أكمل !! .........
هنا يظهر صبى القهوة " عاوزين تشربوا إية يا بشوات " ، وبعد كلمات متبادلة ، كمال طلب شاى وشيشة ، وجوده طلب سحلب ، ومضى صبى القهوة يحضر الطلبات
جوده : هااااااا كمل يا سى كمال اللى إنت كنت هتقوله
كمال : يا سيدى الموضوع بسيط ! المقاومه بالحيله دى عمليه بيعملها الناس للمحايله والتغلب على أوضاعهم المعيشيه اليوميه ! الناس فى الخناقه تبقى نفسها تبقى شرسه بس خايفه تدفع الثمن ، يعنى تلاقيهم بيشتموا وهما نفسهم يقتلوا بس خايفيين من السجن، بيمسكوا فى هدوم بعض وخايفيين من تقطيعها علشان مش معاهم حق هدوم جديدة ،
جوده : أيوه كدا انا فهمت !
صبى القهوه يظهر ويضع المشروبات على الترابيزه ، ومعه صبى آخر يضع الشيشه على الأرض ويعطى كمال " لى "الشيشه . لحظات ودخان الشيشه بدأ يخرج من منخار كمال :
كمال : الا قولى يا جوده ! هوا إيه اللى عاجب أمك فى مشروب السحلب إبن " .... " دا
جوده : مقاومه بالحيله يا روح امك
كمال : هههههههههههه لا أنا بتكلم بجد ، دا مشروب ولا وجبه بتغمس فيها ؟!
جوده : دا إتنين فى واحد ، ميكس بين المقاومه بالحيله والمقاومه بالإستعباط !!
كمال مستغربا : مقاومة إستعباط إيه دى يا جوده ! جبتها منين دى ؟
جوده : هسألك سؤال ! هوا إنت جبت كلمة المقاومه بالحيله منين ؟
كمال : من كتاب قرأته لواحد من المؤلفين
جوده : مصرى ؟!
كمال : لأ .
جوده : يعنى يا كمال بتوع الحمله الفرنسيه يرصدوا الظاهرة فى مصر ويسموها الشوشرة وإنت تتفذلك عليا وتقولى المقاومه بالحيله ، طيب إنت تعرف المقاومه بالإستعباط هيا إيه ؟
كمال : هههههههههههه لا معرفش
جوده : يعنى خد مثلا الناس بتاعت الخناقه بعد الشوشرة حالهم هيتغير ، لأ طبعا !! بردوا الواحد منهم كل يوم هيروح يشترى طعميه من عند بتاع الطعميه اللى بيقنعه إن الطعميه عليها سمسم ، وإن البطاطس معموله بالبيض ، ويروح البيت وهو بيقنع نفسه إنه بيفطر فطار مميز ، مع إنه عارف ان مفيش سمسم ومحطوط بداله كزبره ناشفه ، والبيض اللى على البطاطس عبارة عن دقيق وكركم لزوم اللون ، ماشى بيستعبط نفسه ،
كمال : هههههههههههه زيك وإنت بتشرب السحلب
جوده : تمام ! مشروب أكيد اللى إخترعه كان بيعمله بطريقه تانيه غير طريقه الواد القهوجى اللى بيعمله وكأنه كيكه سايله ، بس مفيد خصوصا لما تكون جعان أهو إستعباط وخلاص .
كمال : طيب بدل الإستعباط ما تقول لبتاع الطعميه يحطلك سمسم على الطعميه وبيض على البطاطس ؟
جوده : لأ
كمال : ليه ؟
جوده : شكلك عبيط يا كمال ! أنا بستعبط وبتاع الطعميه بيستعبطنى عياقه وفذلكه يعنى ، يا حبيبى أنا طرحت سؤال تانى خالص ، فقلت هوا ليه مبيتحطش بيض وسمسم علشان الجودة تزيد ؟
كمال : والجواب كان إيه ؟
جوده : رد عليا بتاع الطعميه متقمصا دور " آدم سميث " إنت لو معاك فلوس أعملك إللى إنت عاوزة ، معكش فلوس تاخد من اللى موجود وتسكت
كمال : والحل يا جوده ؟
جوده : نمشيها شوشرة وإستعباط
ههههههههههههه ضحكات متبادله ، ثم قاما ومشيا ممسكين بإيدى بعضهما ، وأعطى كلا منهما صبى القهوه حساب المشروبات ، وهنا سأل جوده صبى القهوه " هوا اللبن اللى فى السحلب كان ناقص ليه ؟ " فرد عليه صبى القهوه " لبن إيه يا استاذ ، دا لبن بودره " .. ضحكات عاليه ثم وجه جوده كلامه لكمال " وتقولى مقاومه بالحيله ! ككحل وسط يا كمال !! إستعباااااااااااااااااااااااااااط "
ليست هناك تعليقات:
إرسال تعليق
مرحب بكل الآراء ما عدا الآراء التي تحمل محتوى عنصري او يدعو إلى العنف او التفرقه السياسيه والاجتماعيه