بقلم / ياسر رافع
بعد صلاة الفجر وفى بعض الأحيان أحب أروح أشترى طعميه سخنه وعيش وبدنجان مخلل ، لكن فى يوم لقيت المحل اللى بشترى منه لسه قافل طبعا أنا عارف إنه فيه محلات تانيه فاتحه وخصوصا اللى فى مدخل القريه ، وعلشان انا بحب الطعميه السخنه قلت لازم أروح أشتريها وبالمره أشترى البدنجان من عند المعلم " صابر" بتاع الفول ، ولما وصلت إلى محل الطعميه وجدت المعلم لسه بيحمر بطاطس شيبسى والطاسه مشغوله وبيقولى " ممكن تستنى شويه على ما أخلص تحمير البطاطس " ، أنا قلت فى نفسى أروح أشترى البدنجان المخلل وبعدين أرجع ، وفعلا مشيت لحد المعلم صابر بتاع الفول ، والمفاجأه لقيت عنده طاسة طعميه جديده فسألته " هوا إنت هتبيع طعميه جنب الفول ؟فرد عليا " أيوا يا أستاذ أهو أول يوم قلت أجربها يمكن تمشى" ..
طبعا إشتريت البدنجان المخلل وقلت آخد طعميه بالمره خصوصا وأنها هتكون أول طعميه من المشروع الجديد ، دقائق وأخدت طعميه سخنه وعيش وبدنجان مخلل ، وأتجهت للبيت وفتحت قرطاس الطعميه وحطتها فى طبق وبدأت آكل ، وأنا باكل قلت ألقى نظره على اللاب توب فوجدت إشعار على حساب تويتر الخاص بى فقلت أفتحه ، فوجدت واحد سعودى بإسم مستعار مرسل تعقيب على مقال لى عن السعوديه فى مقدمة تعقيبه بدأ توجيه رسالة لى مدعومه بصورة البروفايل بتاعتى بيعايرنى بأنى مصرى من أكلة الطعميه .. فأنا قعدت أضحك بصوت عالى أول مره فى حياتى أسمع وصلة معايره بطبيعة الأكل .
ومن يومين قابلت صديق وفى وسط الكلام قالى
صديقى : أنا أكلت طعميه من عند المعلم صابر وطلعت حكايه على قديمه بس أنا مش متعود عليها وأحب آكل كسكسى بالسكر واللبن من على العربيه جنب الشغل بتاعى فى القاهره"
فقلت مازحا : إنت تعرف إن الكسكسى بيتزرع فى المغرب ؟
فضحك ضحكه عاليه وقال : أنا عاوز أستفسر عن حاجه
قلت : إتفضل ..
صديقى : ملك الأردن فى المغرب بيستقبلوه كالفاتحين وبيقولوا إنه رايح علشان فيه مصالحه هتحصل بين مصر والمغرب ، ومن ناحيه تانيه مصالحه بين مصر والسعوديه علشان القمه العربيه اللى فى الاردن آخر الشهر صحيح الكلام دا ولا دا كلام جرايد ؟؟
أنا : شوف يا سيدى بمناسبة طعميه المعلم صابر والكسكسى بتاع القاهره ، انا هحكيلك حكايه بسيطه بدون كلام كبير فى السياسه ومصطلحات وبطريقه مبتكره وا.....
صديقى مقاطعا : طيب قبل ما تكمل أنا عاوز لما تبقى رايح تفطر فى أى يوم إبقى خدنى معاك
أنا : ماشى بس سيبنى أكمل ، المهم يا سيدى إنت لو متابع هتعرف إن المطبخ المصرى من أفقر المطابخ فى العالم مفيهوش تنوع آكلات وكل الأكلات اللى إحنا بناكلها معظمها وصفات دخيله علينا لكن إحنا بنمصرها ونطبعها بطبعنا زى أكلة الكسكسى اللى الفاطميين جلبوها معاهم وهما جايين يغزوا مصر وعلى الرغم من إنها آكله شعبيه فى كل شمال أفريقيا وبتتعمل باللحمه والمرقه والدواجن إلا أنها لما وصلت مصر طبعناها بفقرنا وعلشان كل اللى فى مقدرة المصريين من مكونات الأكله الدقيق فقط فطبعا عملنا الكسكسى ساده وطبعا مينفعش فحطينا عليه سكر علشان يتبلع وبقينا نعامله كحلويات علشان شح المرقه .. ولما راح الفاطميين وراحت أيامهم فضل الكسكسى بفقره المصرى لا يعبر عن شئ حتى عصام ابن شعبان عبدالرحيم غنى له وقال مبحبش الكسكسى أبدا بقالى سنين تقيل على معدتى وكله كله عجين . متبصليش وتشبطنى الكسكسى بيوجع بطنى .. وبكدا فقدت الأكله بريقها المغربى وثقافه ذهبت مع الريح ..
لكن المصرى بيحب الطعميه اللى مسجلها بإسمه فى موسوعة المأكولات العالميه كأكله مصريه صميمه خلط فيها مكونات الأرض المصريه منذ قديم الأزل فعبرت عن ثقافته صاحبة الجذور القويه لم تقتلعها كل الأكلات الوافده حتى الأن ، وتاثيرها إمتد إلى المشرق العربى الذى يأكل الطعميه بنكهتها المصريه وعلى الرغم من إستبدال الفول فى المشرق العربى ووضع الحمص مكانه إلا أن ثقافة مصر بأكلتها المميزه حاضره ، ودا على الرغم من الأكلات المميزه لأهل الشام والعراق ،
صديقى : والخليج فين ؟؟
أنا : الخليج معندوش أى حاجه مميزه فى أكلاته كلها أكلات صحراويه دخل عليها الغنى فتبدل اللحم الصحرواى بلحم غنم إسترالى مستورد لكنهم بيحبوا الكسكسى المغربى فى الأجازات الملكيه على شواطئ الأطلنطى فى المغرب اللى بيفكرهم بعز ملكى قديم لم يتوفر لهم إلا من قريب مخلوط بغنم مستورده .
علشان كدا لازم تعرف إن القمه العربيه فى الأردن ما هى إلا محاولة توفيق بين الطعميه وتأثيرها الطبيعى فى المحيط الحضارى العربى وبين ثقافة الكسكسى المندثره التى تعبر عن ممالك تملك مال ولا تملك التأثير الثقافى والحضارى تحاول أن تهيمن فى هذا الزمان الرخو
هو : يعنى مفيش مصالحه
أنا : لا فيه مصالحه لكن مش هتكون الإ بضغط أمريكى هيوفق فيه بين الطعميه والكسكسى ، حتى لو وصل الأمر إنه يخللى الهامبورجر ودجاج تكا هو المهيمن على أكل الجميع .. وورا دا كله شويه كوكاكولا حجم عائلى
وقف فجأه صديقى وقعد يرقص ويغنى أغنية عصام شعبولا اللى إتضح إنه حافظها
مبحبش الكسكسى أبدا بقالى سنين ، تقيل على معدتى وكله كله عجين
بحب الرز ابو لبن والكشرى بالدقه .. والفول كمان بعشقه وأكل كام شقه
كسكسى كسكسى ولا أحب أشوف أبدا شكله
متبصليش وتشبطنى الكسكسى بيوجع بطنى
الكسكسى بقى مالى السوق أنا تعبان منه ومخنوق
الكسكسى على المعده تقيل لو حتى مسكر وجميل
كل ما أدوقه يجرالى حاجه لو حتى جوه التلاجه
الكسكسى حلاوته قليله ومش أحلى منك يا بليله
من الكسكسى مبخوفكوش أنا اللى أصلا مبحبوش
... وقفت جانبه ضاحكا بحاول أسكته ..
أنا : علشان إنت فهمتها لوحدك بكره الفطار عندى ، طعميه سخنه وعيش وبدنجان
يلا سلام ..
.jpeg)
ليست هناك تعليقات:
إرسال تعليق
مرحب بكل الآراء ما عدا الآراء التي تحمل محتوى عنصري او يدعو إلى العنف او التفرقه السياسيه والاجتماعيه